政Whats噏：不滿骨灰龕安排 議員促削陳肇始薪酬
資料: 東網
每年一眾泛民立法會議員都會喺《撥款條例草案》提出扣減官員人工嘅修正案，而今年已獲立法會主席梁君彥批咗嘅65項修正案入面，就有10項同扣減問責官員人工有關，以特首及16名司局長共17人計算，即有近六成人被要求扣人工，當中環境局局長黃錦星、食物及衞生局局長陳肇始意外地榜上有名，不過佢哋都只係被要求扣減一個月人工，其餘8人則被要求扣半年至全年人工不等。
扣減陳肇始人工係由民主黨議員黃碧雲提出，佢話係出於不滿公營骨灰龕位安排，指未來政府將不設永久骨灰龕位，而且每10年須續期嘅做法擾民，批評政府唔應該喺冇公眾諮詢嘅情況下改變政策，不過衡量埋陳肇始其他工作表現，就決定提出只扣佢一個月人工。
其餘8人包括特首林鄭月娥、政務司司長張建宗、律政司司長鄭若驊、教育局局長楊潤雄等，佢哋全部被要求扣減全年人工。至於竟然冇人要求扣減財政司司長陳茂波人工，可謂意料之外。
